როგორ მოვუაროთ თავს? - რამდენიმე რჩევა კაცებს

კაცებისთვის განკუთვნილ კოსმეტიკურ ნაწარმს თანამედროვე ბაზარზე გაცილებით ნაკლები ადგილი უჭირავს, ვიდრე ქალებისას, მაგრამ არსებობენ მამრობითი სქესის წარმომადგენლები, რომლებსაც თავის მოვლა უმნიშვნელო რამედ სულაც არ მიაჩნიათ. თანამედროვე კაცს სურს, კარგად გამოიყურებოდეს, მაგრამ ყველას არ აქვს ფული ტანსაცმლისა თუ მოდური აქსესუარების შესაძენად, დრო კანის, თმისა და სხეულის მოსავლელი პროცედურების ჩასატარებლად.

თუ ქრონიკულად მოუცლელი ბრძანდებით, მაგრამ გსურთ, სუფთად და მიმზიდველად გამოიყურებოდეთ, დაიმახსოვრეთ და გაითვალისწინეთ რამდენიმე მარტივი და ადვილად შესასრულებელი რჩევა. უპირველეს ყოვლისა, რეგულარულად გაიწმინდეთ, დაიტენიანეთ და ტონუსში მოიყვანეთ სახის კანი. თუ კანი ცხიმიანობისკენაა მიდრეკილი, გამოიყენეთ დასაბანი საშუალება, რომელიც არ შეიცავს საპონს, ხოლო დაბანის შემდეგ კრემის მაგივრად წაისვით დამანოტივებელი გელი ან თიხის თვისებების მქონე კრემი.

კანის გასაწმენდად და ტონუსში მოსაყვანად გამოიყენეთ სკრაბი. არსებობს სხვა დასაბანი საშუალებებიც სკრაბის ეფექტით. ისინი ასუფთავებენ ფორებს ჭუჭყისა და მკვდარი უჯრედებისგან, რომლებიც სახეს ფერმკრთალ, ავადმყოფურ შესახედაობას აძლევს. სასარგებლოა კვირაში ერთხელ სახის ორთქლით დარბილება 10 წუთის განმავლობაში და შემდეგ ცივი წყლით დაბანა, საუნა კი შესანიშნავად იმოქმედებს არა მარტო გარეგნობაზე, არამედ ჯანმრთელობის საერთო მდგომარეობაზეც.

ეცადეთ, შინიდან გასვლის წინ ყოველთვის წაისვათ მზისგან დამცავი კრემი - ეს თავიდან აგაცილებთ მზით დამწვრობას და პიგმენტურ ლაქებს. მსუბუქი მასაჟი სახის კანს ტონუსში მოიყვანს და მას ჯანსაღ და მიმზიდველ შესახედაობას მიანიჭებს. მასაჟი შეიძლება კრემის წასმისას გაკეთდეს. გაანაწილეთ დამატენიანებელი საშუალება თითის ბალიშების მსუბუქი დარტყმით პერიფერიიდან შუაგულისკენ. პარსვის წინ სახე კარგად დაიბანეთ და მხოლოდ ამის შემდეგ წაისვით საპარსი კრემი. უკეთესი ეფექტისთვის ერთი წუთით გაიჩერეთ და გაიპარსეთ. გამოიყენეთ საპარსი კრემი Е ვიტამინისა და ალოეს შემცველობით - ის კანს დაზიანებისა და გაღიზიანებისგან დაიცავს.

წყარო: mkurnali.ge