"ვიწყებთ მეორე მოსმენით კანონის მიღების გაპროტესტებას" – დღეს, პარლამენტთან აქცია ჩაინიშნა

დღეს, 19:00 საათზე, პარლამენტთან ე.წ. რუსული კანონის საწინააღმდეგო აქცია გაიმართება. ორგანიზატორები არიან ტალღა, მწვანეები, ჯიუტი, კარი და სტუდენტები ევროპული მომავლისთვის.

"30 აპრილს, 19:00- საათზე, პარლამენტის წინ კვლავ ვაპროტესტებთ რუსულ კანონს. რუსული კანონი გვაშორებს ევროპას! საქართველოს მოქალაქეების მკაფიოდ გამოხატული ნება, საქართველო გახდეს ევროკავშირის სრულყოფილი წევრი, დასაცავია! რუსული კანონის პროექტის მეორე მოსმენა შესაძლოა გაიმართოს 30 აპრილს, 1 მაისს, 2 მაისს ან 3 მაისს.

სავარაუდოდ, ერთ დღეს დაწყებული მეორე მოსმენა კენჭისყრისთვის გადაიწევს მეორე დღეს. ამდენად, 30-ში ვიწყებთ მეორე მოსმენით კანონის მიღების გაპროტესტებას. საქართველოს მოქალაქეებო, დავდგეთ ერთად და ხელი შევუშალოთ საქართველოს რუსეთიზაციას. ვანახოთ ხელისუფლებას, რომ ძალა ჩვენშია, ძალა ხალხშია, უნდა მოგვისმინონ! არა რუსულ კანონს!", - ნათქვამია განცხადებაში.

მანამდე, კიდევ ერთი აქცია პარლამენტთან, 12:00 საათზეა დაგეგმილი. ამ დროს საკანონმდებლო ორგანოში პლენარული სხდომაა დაგეგმილი. "ოცნება" ე.წ. რუსულ კანონს დღეს განიხილავს.

შეგახსენებთ, გუშინ, იურიდიულ საკითხთა კომიტეტმა კანონპროექტს მეორე მოსმენით მხარი დაუჭირა. განხილვაზე კომიტეტის თავმჯდომარემ, ანრი ოხანაშვილმა სხდომიდან ოპოზიციონერი დეპუტატები და არასამთავრობო ორგანიზაციის წარმომადგენლები გააძევა.