პოლონეთში, მკვლელობის ბრალდებით საქართველოს მოქალაქე დააკავეს

პოლონეთში, დააკავეს საქართველოს მოქალაქე, რომელსაც ნეპალელი ახალგაზრდის მკვლელობას ედავებიან. ადგილობრივი მედიის ცნობით, ქართველმა 28 წლის კაცს კისერში დანით ჭრილობები მიაყენა.

შემთხვევა ქალაქ სლუპსკში, ერთ-ერთ წვეულებაზე, 25 თებერვალს მოხდა.

გამოცემის ცნობით, დამნაშავეს ბრალი უკვე წარუდგინეს. პროკურატურამ მისთვის 3 თვიანი წინასწარი პატიმრობა მოითხოვა.

დანაშაულის დაფარვისთვის დაკავებულია ორი უკრაინელი ქალიც. გამოძიების ინფორმაციით, ისინი დანაშაულის იარაღის მოშორებას შეეცადნენ.

საქართველოს მოქალაქეს დანაშაულის დამტკიცების შემთხვევაში 8-დან 25 წლამდე ან უვადო თავისუფლების აღკვეთა ემუქრება.