აჭარის მთავრობა - გაზარდეთ დაფინანსება სტუდენტებისთვის - პეტიცია

"გაზარდეთ დაფინანსება სტუდენტებისთვის" - ამ მოთხოვნით, აჭარის მთავრობას რეგიონში მოქმედი სტუდენტები მიმართავენ.

მათ პეტიცია შეადგინეს და ხელმოწერებს აგროვებენ. ავტორი მაკა ტოხიშვილია. ამ დროის მონაცემებით [16:10], დოკუმენტს ხელს 155 სტუდენტი აწერს. საჭიროა 500.

მანიფესტის ხელმომწერები ფიქრობენ, რომ პანდემიისა და მძიმე სოციალურ-ეკონომიკური მდგომარეობის ფონზე, პრობლემა განსაკუთრებით გამწვავდა და სწორედ ამიტომ, უამრავ სტუდენტს სტატუსი შეუჩერდა.

"უმაღლესი განათლების ხელმისაწვდომობა საქართველოში მნიშვნელოვან გამოწვევად რჩება. 2021 წელს სტატუსშეჩერებულ სტუდენტთა რიცხვმა ისტორიულ მაქსიმუმს მიაღწია - 82 212 სტუდენტი (თითქმის ყოველი მეორე) ვეღარ აგრძელებს სწავლას, მათ შორის, ფინანსური დავალიანების გამო - 33 109 (რეალურად, ეს ციფრი გაცილებით მეტია, რადგან, გარკვეული მოსაზრებების გამო, სტუდენტები ოფიციალურად არ აფიქსირებენ ფინანსურ პრობლემას).

მძიმე სოციალურ-ეკონომიკური პრობლემების ფონზე, აღნიშნული პრობლემა განსაკუთრებით მწვავედ დადგა პანდემიის დროს. 01.02.2020 წლიდან დღემდე (პანდემიის პერიოდში): სტატუსი შეუჩერდა 63 037 სტუდენტს, ფინანსური დავალიანების გამო  - 28 401 სტუდენტს.

ორგანიზაცია „პროგრესის ცენტრის“ ინიციატივით, სტატუსშეჩერებული სტუდენტების დაფინანსების მოთხოვნით შევადგინეთ პეტიცია  - 10 ათასი სტუდენტის სახელით, რის შედეგადაც ქ. თბილისის მერიამ გაითვალისწინა ჩვენი მიმართვა და გასულ წელს, დააფინანსა როგორც წარჩინებული სტუდენტები, ასევე სოციალურად დაუცველთა კატეგორია - (150 000 ქულა და ნაკლები). მომავალი წლის ბიუჯეტის პროექტით კი გათვალისწინებულია 3 000-ზე მეტი სტუდენტის დაფინანსება.

მართალია, სტუდენტები დაფინანსდნენ აჭარის განათლების, კულტურის და სპორტის სამინისტროს სპეციალური პროგრამებითაც, თუმცა, ჩამოყალიბებულია მთელი რიგი კრიტერიუმები, რომლის საფუძველზეც უამრავი სტუდენტი, რომელთაც აქვთ მძიმე სოციალურ-ეკონომიკური ფონი, გამწვავებული პანდემიის დროს, რჩება განათლების მიღმა.

დღეს არსებული ოფიციალური მონაცემით, სწავლას ვეღარ აგრძელებენ: სსიპ - ბათუმის შოთა რუსთაველის სახელმწიფო უნივერსიტეტი - 2008 სტუდენტი, სსიპ - ბათუმის ხელოვნების სასწავლო უნივერსიტეტი - 61 სტუდენტი, სსიპ - სასწავლო უნივერსიტეტი - ბათუმის სახელმწიფო საზღვაო აკადემია - 724 სტუდენტი.

ფინანსური დავალიანების გამო სტატუსი შეჩერებული აქვს - სსიპ - ბათუმის შოთა რუსთაველის სახელმწიფო უნივერსიტეტი - 637 სტუდენტს, სსიპ - ბათუმის ხელოვნების სასწავლო უნივერსიტეტი - 7 სტუდენტს, სსიპ - სასწავლო უნივერსიტეტი - ბათუმის სახელმწიფო საზღვაო აკადემია - 37 სტუდენტს.

ამიტომ, მოგმართავთ აჭარის ავტონომიური რესპუბლიკის განათლების, კულტურისა და სპორტის სამინისტროს, გაითვალისწინოთ პანდემიური მდგომარეობა, მძიმე-სოციალურ ეკონომიკური ფონი, შეისწავლოთ სტუდენტების საჭიროებები, სტუდენტთა სწავლის დაფინანსებისთვის, გაზარდოს ბიუჯეტი და  გაზარდოთ სოციალურად დაუცველი სტუდენტების ქულათა კატეგორია (როგორც ეს თბილისის შემთხვევაშია) 150 000 ქულა", - წერია პეტიციაში.