აშშ-ში, ეჭვიანობის ნიადაგზე, საქართველოს მოქალაქე მოკლეს

ამერიკის შეერთებულ შტატებში საქართველოს მოქალაქე მოკლეს. ადგილობრივი მედიის ინფორმაციით, 42 წლის კაცი მეგობარი ქალის ყოფილმა მეუღლემ, სავარაუდოდ, ეჭვიანობის ნიადაგზე მოკლა. მკვლელობა ბრუკლინში, მანქანების ავტოსადგომზე მოხდა, სადაც მანამდე ქალსა და მის 47 წლის ყოფილ ქმარს შორის სიტყვიერი დაპირისპირება იყო.

პოლიციის თქმით, საქართველოს მოქალაქეს ჭრილობები ცეცხლსასროლი და ცივი იარაღით მიაყენეს. ადგილობრივების თქმით, ჯერ ჩხუბის ხმა გაიგეს, შემდეგ კი ქალის, რომელიც პოლიციის გამოძახებას ითხოვდა. დაჭრილი ქართველი კლინიკაში გადაიყვანეს, თუმცა მისი გადარჩენა ვერ შეძლეს.

ამერიკული მედიის ცნობით, თავდამსხმელი პოლიციამ უკვე დააკავა. დანაშაულის ჩადენის იარაღი კაცის მანქანაში იპოვეს.