გაერომ თურქეთის საერთაშორისო სახელწოდება შეცვალა

გაერთიანებული ერების ორგანიზაციამ დააკმაყოფილა თურქეთის მოთხოვნა უცხო ენებზე ქვეყნის სახელწოდების შეცვლასთან დაკავშირებით. ამის შესახებ Anadolu წერს.

გამოცემის ინფორმაციით, ახლა თურქეთის საერთაშორისო სახელწოდება Turkey-ს ნაცვლად Türkiye იქნება. შესაბამისი განცხადების გამოქვეყნების შემდეგ, გაეროს ყველა საერთაშორისო ფორუმსა და ოფიციალურ დოკუმენტში Türkiye იქნება გამოყენებული.

ქვეყნის სახელწოდების შეცვლის მოთხოვნით, გაეროს გენერალურ მდივანს თურქეთის საგარეო საქმეთა მინისტრმა მიმართა. მევლუთ ჩავუშოღლუს განმარტებით, ამ გადაწყვეტილებამ ქვეყნის ბრენდის პრესტიჟის ამაღლებას უნდა შეუწყოს ხელი.