საქართველოსა და პერუს შორის უვიზო მიმოსვლა იქნება

საგარეო საქმეთა სამინისტროს ცნობით, 18 სექტემბერს საქართველოსა და პერუს რესპუბლიკას შორის უვიზო მიმოსვლის შესახებ შეთანხმება გაფორმდა. მინისტრი, ილია დარჩიაშვილი კოლეგას გაეროს გენერალური ასამბლეის 78-ე სესიის ფარგლებში შეხვდა.

უწყება ამბობს, რომ მხარეებმა განიხილეს ორმხრივი და მრავალმხრივი დღის წესრიგის აქტუალური საკითხები და სამომავლო პერსპექტივები.

"ხაზი გაესვა მაღალი დონის ვიზიტების განხორციელების მნიშვნელობას და თანამშრომლობის გაღრმავებას პოლიტიკურ, სავაჭრო-ეკონომიკურ, კულტურისა და განათლების სფეროებში", - წერია განცხადებაში.

საქართველოს უვიზო მიმოსვლა აქვს 70-ზე მეტ ქვეყანასთან.